Kaizenlog

 

 

 

 

 

 

NO. 1694

 

 

Kullana ta’ Proġetti ta’ tisbiħ fiċ-ċentri ta’ l-irħula mifruxa mal-pajjiż kollu

 

 

Fl-aħħar erba’ snin rajna ħidma qawwija u elaborata sabiex diversi ċentri ta’ l-irħula tagħna jingħataw dehra isbaħ, liema xogħlijiet waslu sabiex l-istess ċentri joħorġu l-karatteristika tagħhom. Ix-xogħlijiet kienu jinkludu tisbiħ taz-znieter, illuminazzjoni tal-faċċati tal-knejjes parrokkjali u fejn kien possibli ġie msebbaħ ukoll iċ-ċentru jew il-pjazza tar-raħal konċernat. Il-Ministru għar-Riżorsi u Infrastruttura, il-Perit Ninu Zammit qal dan meta kien qed iżur xogħlijiet ta’ tisbiħ li qed isiru fiz-zuntier tal-Knisja Parrokkjali ta’ l-Imqabba.

 

Dan ix-xogħol se jkompli jżid il-kullana ta’ proġetti simili li saru fl-aħħar erba’ snin li kienu jinkludu:

·                    tisbiħ fiċ-ċentru ta Hal-Safi,

·                    fiċ-ċentru tal-Mellieħa,

·                    fiċ-ċentru ta’ Ħal Lija,

·                    fiċ-ċentru ta’ Hal-Kirkop,

·                    pjazza Paolino Vassallo f’Bormla,

·                    zuntier tal-knisja parrokkjali taż-Żurrieq,

·                    zuntier tal-knisja parrokkjali ta’ Haż Żabbar,

·                    fiċ-ċentru ta’ B’Buġa,

·                    mad-dawra tal-knisja ta’ San Bastjan u

·                    z-zuntier tal-knisja parrokjali ta’ San Gwann.

 

Barra minhekk, fil-preżent qed jiġu konklużi xogħlijiet fiċ-ċentru tal-Qrendi u fuq iz-zuntier tal-Knisja parrokkjali ta’ Ħal Balzan.

 

Meta kien qed jispjega x-xogħlijiet, il-Ministru Ninu Zammit qal li wara li nqala l-wiċċ l-antik li kien magħmul mill-madum tas-siment, ġew mgħoddija l-pajpijiet li minnhom se jgħaddu l-cables ta’ l-elettriku. Peress li taħt il-madum tas-siment instabet art magħmula minn ċangatura tal-franka ma nħassx il-bżonn li tingħata sodda tal-konkos iżda kien biżejjed li jintefa’ materjal apposta sabiex jiġu rispettati l-livelli eżistenti.

 

Wara li tlesta dan ix-xogħol beda jitpoġġa l-madum li hu kompost minn ċangatura taż-żonqor u madum tal-granit. Id-disinn magħżul hu wieħed li jikkumplimenta ma’ l-arkitettura tal-knisja. L-area totali tal-pavimentar hi ta’ madwar 400 metru kwadru u se jiġu nstallati sbatax-il uplighter li se jilluminaw il-faċċata tal-knisja. Il-bankina tad-dawra tal-knisja wkoll ser jinbidlilha l-wiċċ u flok il-konkos se jitpoġġa madum taż-żonqor.

 

F’kelmtejn lill-ġurnalisti preżenti l-Ministru Zammit qal li l-investiment tal-Gvern f’dawn il-proġetti ta’ tisbiħ hu wieħed sostanzjali u qed jissarraf f’xogħlijiet ta’ fejda, indirizzat mhux biss lejn il-lokalita’ konċernata, iżda lejn l-iżvilupp tal-pajjiż in ġenerali. B’ħidma kollettiva mill-ħaddiema fi ħdan il-Ministeru qed twassal sabiex b’irranġar b’materjal adattat, kif ukoll l-illuminazzjoni b’dawl artifiċjali ta’ l-ibliet u l-irħula ta’ dawn iċ-ċentri qed jissarrfu f’ambjenti isbaħ kif ukoll fi preservazzjoni aħjar tal-wirt arkitettoniku u vernakulari li pajjiżna huwa mżejjen bihom. Il-ħidma se tissokta fil-ġimgħat u x-xhur li ġejjin, fejn se jibdew xogħlijiet fiċ-ċentru tas-Siġġiewi, f’Santa Venera, fil-Fgura, f’Santa Luċija u fuq iz-zuntier tal-knisja ta’ San Ġorġ f’Ħal Qormi.

 

 

DOI – 08.11.2007

Welcome back to Kaizenlog.com, you may want to subscribe to my RSS feed , Twitter You can contact us by using the contact form or submitting a comment. You can also share this post with your friends by clicking on the 'ShareThis' button above. Thanks for visiting!

 Print This Post

This entry was posted on Thursday, November 8th, 2007 at and is filed under Kaizenlog.You can follow any responses to this entry through the RSS 2.0 feed. You can leave a response, or trackback from your own site.