Kaizenlog

 

 

 

 

 

Nru. 1693

 

 

JUM IL-PEPRINA

 

 

Numru ta’ tfal mill-iskola Primarja tal-Furjana, parti mill-Kulleġġ San Gorg Preca, u numru ta’ tfajliet mill-Kulleġġ Maria Reġina Skola Sekondarja Bniet tal-Mosta ħadu sehem f’attivita’ taħt il-Qanpiena ta’ l-Assedju l-Kbir biex jiġu mfakkra dawk li ħadu sehem fl-ewwel u t-tieni gwerra dinjija.  Fil-11 ta’ Novembru 1918 intemmet l-ewwel gwerra dinjija u għalhekk f’diversi pajjiżi madwar id-dinja din il-ġurnata titfakkar bħala Jum il-Peprina (Poppy Day) jew Jum it-Tifkira (Remembrance Day). L-attivita` ġiet organizzata mill-Minsteru u d-Diviżjoni ta’ l-Edukazzjoni u fiha l-istudenti kantaw u qraw siltiet marbuta ma’ l-okkażjoni.

 

Il-Ministru Louis Galea qal li it-tfal li twieldu f’dawn l-aħħar 50 sena ta’ paċi f’pajjiżna ma jafux minn liema tbatijiet għaddew dawk li għexu l-gwerra f’pajjiżna.  Louis Galea qal li meta l-ġenituri ta’ llum kienu żgħar żgur li kienu jisimgħu lill-ġenituri tagħhom jew lin-nanniet tagħhom jirrakkuntaw ġrajjiet marbutin mal-gwerra u b’hekk setgħu jkollhom idea tal-problemi li ffaċċjaw ta’ qabilhom u s-sagrifiċċji li kellhom jgħaddu minnhom fil-ġlieda għall-liberta` u l-ħelsien.  Louis Galea qal li għat-tfal illum il-Gwerra Dinjija hija xi ħaġa ta’ l-istorja u dawk li jitkellmu dwarha u li għexuha huma ftit u qed jonqsu kull ma jmur. 

 

Madankollu l-gwerer huma realtà anke llum fl-2007. Filwaqt li l-Unjoni Ewropea taħdem għall-paċi qatt m’għandna naħsbu li aħna kompletament protetti mill-gwerer.  Fl-istess ħin ilkoll irridu napprezzaw il-paċi li qed ngħixu f’pajjiżna illum, nirringrazzjaw lil missirijietna li b’tant sagrifiċċju ħadmu għaliha, u nagħmlu l-almu tagħna kemm bħala individwi kif ukoll bħala pajjiż biex inxerrdu l-paċi fost in-nazzjonijiet u bejn il-kulturi.

 

Louis Galea faħħar lill-istudenti għall-inizjattiva tagħhom biex titfakkar din il-ġurnata u sejjaħ biex f’dawn il-jiem l-iskejjel kollha jieħdu ftit żmien biex jirriflettu fuq dawn l-avvenimenti li għalkemm seħħew fil-passat huma parti mill-istorja reċenti ta’ pajjiżna u realta’ li għadhom qed jgħixu numru ta’ pajjiżi madwar id-dinja.

 

Is-Sur Lawrence Mizzi, ex-Edukatur u kittieb dwar il-Gwerra f’Malta, ta ir-riflessjonijiet tiegħu dwar kif il-Maltin kienu għexu t-Tieni Gwerra Dinjija mill-lenti tiegħu bħala tifel li għex żmien il-Gwerra.  Saret ukoll talba mill ex-education officer tar-religjon Fr. Michael Zammit u Fr. Alfred Agius subject co-ordinator tar-religjon.  Il-Ministru ta’ l-Edukazzjoni flimkien ma’ Kristal DeGabriele u Ander Micallef mill-Iskola tal-Furjana poġġew kuruni magħmulin mill-peprin.  Preżenti għaċ-ċerimonja kien hemm il-Kummissarju Għoli Ingliż l-E.T Nick Archer u il-President u ċ-Chairman tal-Poppy Appeal Fund is-Sinjura Janatha Stubbs u s-Sur Charles Cilia rispettivament.

 

Fl-aħħar parti taċ-ċerimonja, żewġ suldati tal-Forzi Armati ta’ Malta daqqew il-Last Post – użat f’ċerimonji pubbliċi b’tifkira għall-mejtin tal-gwerra, speċjalment f’Jum it-Tifkira fil-pajjiżi tal-Commonwealth.  Dan kien segwit b’minuta ta’ silenzju u wara indaqqet ir-Reveille (li tfisser qawmien). Dawn jissimbolizzaw il-mewt u l-qawmien. Wara ndaqqet il-Qanpiena ta’ l-Assedju l-Kbir.

 

 

DOI – 08.11.2007

 

Welcome back to Kaizenlog.com, you may want to subscribe to my RSS feed , Twitter You can contact us by using the contact form or submitting a comment. You can also share this post with your friends by clicking on the 'ShareThis' button above. Thanks for visiting!

 Print This Post

This entry was posted on Thursday, November 8th, 2007 at and is filed under Kaizenlog.You can follow any responses to this entry through the RSS 2.0 feed. You can leave a response, or trackback from your own site.